喺流行四大天王全盛期嘅九十年代香港，有三位青年與一部叫「玲玲」鼓機以 AMK 之名，寫下〈浪漫是你的本性〉、〈請讓我回家〉、〈不歸家的女孩〉等曲風國際節韻獨特，媲美 The Smiths、Teenage Fanclub、Ride 嘅廣東歌，留低與當時主流完全不一樣嘅聲音歷史，係名乎其實嘅香港indie pop先鋒。

喺1996年交出最後一張專輯《勁歌金曲大雀局》後 AMK 正式解散，三位成員各有去路。其中主音關勁松以樂評身份繼續與另類音樂文化結緣，又與另一傳奇人物亞里安拍檔主持商台節目《不設劃位》，而佢有份創辦嘅「維港唱片」，日後成為 False Alarm、22Cats、在草地上、my little airport 等本地獨立樂隊嘅基地。

AMK之後，關勁松曾組 Handmade、人頭馬、時針等樂隊，繼續喺音樂中抒發佢鬼馬而細膩嘅生活觀點；2021年，又招攬不同樂手結成「關勁松的Astrology」再次投入音樂創作，更準備踏上2023的Clockenflap舞台，但好遺憾阿松因病離世。剩餘隊員接力完成阿松生前手筆並推出大碟《永存世上的聲音》，收錄〈女仔衫〉、〈接受我放棄你〉等共十首歌曲，去年起透過巡演方式傳播，嚟緊將會走到 Clockenflap，完成阿松未竟嘅舞台之約。