Vaundy

佢終於嚟香港喇😭 坐擁17首破億點播金曲，超人氣日本多元藝術家兼唱作人 Vaundy 今個12月將來港進行首次海外公演兼本年度日本以外亞洲地區唯一演出，唔單只獻上Clockenflap首演，更加會喺星期五晚主舞台壓軸登場！

六年前，19歲嘅Vaundy做出一首新派city pop風格嘅〈Tokyo Flash〉，由佢自家製作嘅MV短短兩個月收獲百萬點播，竄紅後又再快速交出混合嘻哈元素嘅〈不可幸力〉、走搖滾風格嘅〈怪獣の花唄〉、帶有bedroom色彩嘅〈踊り子〉等多首流行度超高嘅大熱單曲，備受海內外樂迷矚目。

深愛動漫文化嘅Vaundy出道後受到各大製作組青睞，接連為多套大量人氣動畫寫出主題曲，包括《國王排名》、《鏈鋸人》、《SAKAMOTO DAYS》，以及最新番嘅傑作《光逝去的夏天》等等，持續吸引大量新樂迷入坑。作為Gen Z跨領域創作人的先驅者，Vaundy由詞曲編監、MV執導、影像製作以至創意指導，都一手包辦，個人風格相當立體；身為日本流行界當前最才氣出眾嘅作曲人之一，Vaundy亦受邀替Ado、milet、幾田 りら、Aimer、yama、菅田將暉、平野紫耀 (Number_i)等當紅歌手寫歌及擔任監製。

明年2月Vaundy將會喺日本全國四個巨蛋舉行「DOME Tour」，成為當地史上最年輕達成此壯舉嘅男歌手，加上三年內兩度得到紅白認證，絕對可以稱佢為令和時代最具代表性嘅唱作鬼才，我哋都知香港樂迷等睇live好耐，今年Clockenflap就帶大家圓夢