14歲以全英國最高分數考獲聲樂八級文憑，出生於音樂世家嘅 Jacob Collier 自小受皇家音樂學院任教嘅母親與阿爺薰陶，細細個就學曉能夠駕馭幾乎任何樂器嘅超人能力，更鍛練出極之敏銳嘅和聲觸覺；佢嘅聲樂壇數高到甚至引起麻省理工學院方面注意，邀請佢參與開發一套A Cappella系統。

生性樂天開朗嘅佢十幾年前就開始喺 YouTube 分享自己嘅翻唱與演奏，其中以爵士風格改編騷靈天神 Stevie Wonder 名作〈Don’t You Worry Bout’ A Thing〉除咗收獲七百萬觀看次數，更得到 Michael Jackson 御用監製 Quincy Jones 青睞，簽約旗下成為全職音樂人。

23歲時，Jacob 推出首張個人大碟《In My Room》，一手包辦曲詞編監演奏，封面上小小房間內塞滿數之不盡嘅樂器，正乎合其秀氣音樂全才形象。正式出道後 Jacob 自此迎來一連串商業與頒獎禮上嘅成功，2017年起斬獲七座格林美獎，包括今年以翻玩名曲〈Bridge Over Troubled Water〉贏得嘅年度最佳編曲（器樂及無伴奏合唱類）。

呢位人氣英倫唱作才子將於12月駕臨 Clockenflap 舞台作首次香港公演，等咗咁耐嘅樂迷們要把握今次機會喇～