上次 GY!BE 喺麥花臣嗰場你有冇去？仲有冇留住嗰晚投影大佬燒完啲菲林喺屋企？要數我哋自己請過做過最難忘嘅演出之一，2016年嗰晚絕對榜上有名。

來自加拿大滿地可嘅 Godspeed You! Black Emperor，團名來自一套關於七十年代日本暴走族嘅紀錄片《ゴッド‧スピード‧ユー! BLACK EMPEROR》，雖然 GY!BE 嘅作品並唔係下下都好似飛車黨咁風馳電掣，但佢哋由1994年組團以來，一直展現出同樣活生生嘅怒。

然而聽 GY!BE 可以感受到嘅自然遠不止一個怒字，自從1997年首張正式大碟《F♯A♯∞》起，再到奠定佢哋後搖宗師地位嘅《Lift Your Skinny Fists Like Antennas to Heaven》，已經包含咗空洞愉快暴烈寂靜連綿種種情感意境，由電結他、小中大提琴、軍鼓交織逐步推進至高潮一發不可收拾，仿佛係用搖滾制式演奏嘅交響樂。

由動輒十人以上嘅團隊組成，GY!BE 現場編制除咗會有龐大嘅樂手陣容，以底片為媒介嘅投影師們同樣係核心演出成員，嚟緊喺 Clockenflap 會唔會燒菲林我哋唔敢寫包單，但保證佢哋嘅演出絕對會令香港樂迷嘆為觀止！