大家等咗好多年，我哋都問咗好多年，終於，有幸帶到呢位神檯級indie傳奇人物嚟香港！

90年代初，Portishead作為英國布里斯托trip hop三巨頭之一，創造出一種魅惑性感迷幻拖沓而兇狠嘅節拍，影響力於日後英倫以至歐美以至小本生燈嘅音樂依然能夠找得到迴響。主音 Beth Gibbons 獨特嘅女聲演繹，更是無人不曉，未曉嘅，即上YouTube睇佢喺 Roseland NYC Live 叼住飛煙唱〈Glory Box〉嗰段，享受吓靈魂被穿透嘅感覺。

自從1997年 Portishead 發表同名大碟後進入半退休狀態好少蒲頭，Beth Gibbons 於2002年推出《Out of Season》展開單飛音樂生涯，玩挨近ambient folk嘅曲風，詭譎而暖心。雖然期間有同 Kendrick Lamar、JJ DOOM及波蘭國家廣播交響樂團等單位合作，但樂迷就要等到2024年先收到 Beth姐第二張純個人大碟《Lives Outgrown》。依然有民謠元素，今次混合弦樂及電烈結他，偶爾滲出 Portishead 時期嗰種緊張感，自然入選各家平台嘅年終榜。