以爭取父母支持為契機，高中時期嘅 AKASAKI 從16歲開始以電腦開始唱作，錄製個人作品並喺 TikTok 等社交媒體發表，憑藉出色嘅旋律與詞感瞬速走紅，尤其係佢嘅唱功腔調成熟程度，完全超越我哋對一般中學生嘅想像。

得到主流關注後，AKASAKI 去年四月以〈弾きこもり〉出道，於Spotify錄得1500萬點播嘅出眾成績；再到七月，佢再喺 TikTok 上率先公開〈Bunny Girl〉副歌部分引起熱議，十月正式推出一週後已經登上日本Billboard Hot 100，最高曾經去到第5位，現時已係串流數字破億嘅超人氣名曲。

而 AKASAKI 將音檔、圖、歌詞等開放公眾自由下載使用嘅經營手法，進一步加速佢音樂嘅擴散速度，成為繼 imase 及 natori 後，日系流行樂迷必需要關注嘅新世代唱作歌手。呢位令和唱作新人王將會於今年 Clockenflap 2025 首踏香港舞台，千祈要把握一睹佢現場公演嘅機會！