JULIA HOLTER 4:30pm • Atum Stage

US
JULIA HOLTER

廣義嚟睇,我地可以將Julia Holter嘅音樂歸類為「室內流行 (chamber pop)」,但歌曲當中散發嘅靈氣,似係一座無限延伸嘅黑色水晶,既深邃又清明,零舍不同。而喺你察覺以前,自身大概已經墮進Julia Holter嘅聲音旋渦,不願離開,只願留低。

身負正統古典樂根底絕對係意料之內,實際上Julia發表於11年嘅首張正式專輯《Tragedy》就以希臘悲劇為題,12年嘅《Ekstasis》則以美國詩詞及宗教文學入歌,創作上有著濃厚嘅學院氣息。乍聽之下,呢位才女似係不食人間煙火嘅哲學家,但Julia擅長將弦樂編排幻化成復古合成音效,加上本人高雅而充滿實感嘅歌聲,我地往往從一首首富實驗性嘅作品中得到扎實嘅感受:曲高而親切,各種矛盾形成Julia獨一無二嘅新銳創作才女面貌。

13年 嘅《Loud City Songs》回歸現實,描寫「城市喧鬧」,唱及狗仔隊、前男友等日常,高倨各大年終排行榜。新作《Have You In My Wilderness》將於今月底發行,曲風除咗以往古典骨架外更滲有生動嘅爵士元素,明亮嘅取態蘊含一股流行氣息。

呢位嚟自洛杉磯嘅淑女仔,無論成長嘅速度抑或高度近年罕見,不禁令人猜想,若然Julia Holter生於4AD世代到底會有何成就,今年就請大家到Clockenflap嘅舞台,親身領受。